يا صانع المكياج الله يجازيك -- خليتني مخدوع في شكل خلي
الله يحرق مصنعك مع مبانيك -- والمعرض الموجود في بيكاديلي
ادعي عسى تعمى وتنشل رجليك -- هذا دعائي دوم لاجيت اصلي
خليتني اركض ورى البنت هاذيك -- واشوفها اجمل غرامٍ حصلي
قلبي عشقها يا حبيبي توماتيك -- وان شافها قلبي يرحب يهلي
هي رحبت بي وقالت الله يحييك -- وقالت هلا بلي عشق زين شكلي
وقالت انا اجمل بنت في اللي حواليك -- شف حسني الأخاذ وروجي العسّلي
طالعتها ثم قلت هالقلب يبغيك --- ومن شاف حسنك خلى غيرك يولي
ابغي اشوفك دون مكياج يكسيك --- وابغى اشوفك بالجمال المحلي
قالت تبيني افرك الوجه تفريك -- واشيل هالبودر وروجي وكحلي
قلت اي نعم قومي عسى الروح تفديك -- ابغي جمالك هالطبيعي يهلّي
قالت دقايق راجعه لك واراويك -- ذاك الجمال اللي لعينك يسلّي
ويوم رجعتلي شربكتني الشرابيك -- وحسيت الارض تدور وانا بمحلي
الخد كنه يا حياتي سيراميك -- والوجه شارع مثل شارع حولي
الوجه كنه بيت كله شبابيك -- من هالحفر في وجهها اللي يعلّي
كله سبب مكياجك الله يجازيك -- خليتني مخدوع في شكل خلي
ونصيحتي لكل شاب من غير تشكيك -- لا لا تسرع ثم تنغش مثلي
اللي بلا مكياج خلها حواليك -- واللي تحط مكياج خلها تولي
وسلامتكم
بقلم الدكتور فيصل العفيف
موضوع: صانع المكياج 
الأحد يوليو 06, 2008 9:25 am
